LAOAG CITY – Inlawlawag ni Sanggunian Panlungsod Member Jason Perera ti kalikagum nga agtultuloy a pannakaipasa ti Draft City Ordinance No. SP-2022-088 wenno ti Amended Rerouting Scheme ditoy siudad ti Laoag iti uneg ti 90 nga aldaw nga experimental period.
Segun ken ni Perera, babaen iti nasao nga ordinansa, gagem a makissayan ti oras a panagbiyahe, gastos iti makonsumo a gasolina ken maliklikan ti nairot a trapiko iti sentro ditoy siudad.
Inpakaammo na a nailanad iti ordinansa nga iti uneg ti 90 nga aldaw ket maobserbaran ti pannakaiyimplimentar ti no left turn kadagiti sumagmamano a kalsada.
Immuna iti daytoy, kuna ni Perera a kangrunaan nga epekto ti nasao nga addang ket al-alisto pay a madanun dagiti pagturungan a lugar.
Naamoan a babaen iti 11th sannguniang, naiyimplimentar ti no left turn policy ditoy siudad kas paset met ti esperimentasyon ti nasao a konseho para iti pannakaliklik ti trapiko.
Mangnamnama ti konsehal nga iti maikatlo ken maudi a pannakaibasa ti nailungalong nga ordinansa ket maipasa ken dagus a maiyimplimentar.
