LAOAG CITY – Inlawlawag ni Konsehal Jason Perera no apay a saanna a pinaboran ti ordinansa nga inpasa ni Konsehal Kiko Ang a masapol nga iti slaughterhouse ti pakapartian amin dagiti dingwen ditoy ciudad ti Laoag, uray dagiti personal a food consumption.
Inpetteng ni Perera a masapol nga adda ti exemption na ti ordinansa no sadinno nga adda ti karbengan dagiti residente a mangparti kadagiti dingwen da basta saan a paglako wenno para negosyo.
Inyarig pay ni Perera ti tradisyon no adda ti agpabalay nga agpadara ti dingwen aglalo ti kalding, ngem iti babaen ti nasao nga ordinansa ket maipawil pay daytoy.
Malaksid iti daytoy, inpalgak ni Perera a no adda ti agpasken a residente iti adayo a barangay manipod iti sentro ditoy ciudad ti Laoag a nasken nga agparti kadagiti dingwen ket ado unay ti oras da a masayang iti panagibiyahe da kadagiti dingwen, agturong iti slaughter house ken agsublin to manen iti balayda.
Innayon na a problema pay dagiti residente ti usaren da a lugan a pagibiyahe da kadagiti mapanda paparti a dingwen iti slaughter house ditoy ciudad ti Laoag.
Mainaig iti daytoy, inpaganetget ni Perera a masapol nga ammo ti limitasyon ti otoridad kas opisyal ti gobierno.
