LAOAG CITY – Manamnama a pagsasaritaan ti konseho iti siudad ti Batac iti sumaruno a sesyon da ti ordinansa a mangipawil ti panaglako, pannakaiwaras, ken illegal a pannakaibakuna dagiti covid vaccines wenno vaccination slots iti nasao a ciudad.
Daytoy ket kalpasan a naipresentar babaen ti committee report daytoy a draft measure iti konseho.
Segun kenni konsehal Gian Crisostomo, chairman ti Committee on Laws, naipalaon iti Food and Drug Admin Act of 2009 a dagiti agas a saan nga aprubado ti FDA ket maipawil a mailako, gatangen ken dadduma pay.
Innayon ti opisyal nga adda ti responsibilidad ti lokal a gobyerno a protektaran ti salun-at dagiti umili rason a karbengan da met ti mangaramid ti ordinansa para iti daytoy nga addang.
Maipalagip nga adda dagiti timpuwar nga isyu ti panaglako ti vaccination slots iti sabali a probinsya ditoy pagilian.
