LAOAG CITY – Ad-adalen ti lokal a gobierno ti ordinansa a pannakaiyakar ti Discolandia iti Barangay 1 ditoy siudad ti Laoag.
Segun ken ni Mayor James Bryan Alcid, basar iti ordinansa ket masapul a masarakan iti asideg iti agricultural area isu a kasapulan a kitaen a naimbag ken maplastar.
Inbatadna a naruay dagiti makiddaw a tulong manipud iti National Government kas iti benneg ti imprastraktura wenno ti baro a Goverment Center wenno City Hall ditoy siudad no sadinno a ti maysa a kitkitaenda a lokasion a pangipatakderan nga asideg ti sentro ket iti Discolandia.
Inlawlawagna a saan met a mabalin nga ipa-reconstruction ti City Hall gapu ta daytoy ket maibilang kas maysa nga heritage.
Nupay kasta, kunana awan pay ti pinal a desision no sadinno ti pangiyakaran ti Discolandia ti Barangay 1 ngem masapul a masurot ti nailanad iti ordinansa.
Innayonna a no bilang matuloy daytoy a plano ket ti City Hall ket manamnama a mapagbalin a museo.
