LAOAG CITY – Immapela ni Vice Mayor Vicentito Lazo ditoy ciudad ti Laoag iti Sang Panlalawigan nga ikonsiderar da ti ordinansa ti ciudad para iti pannakaipataw ti pannusa kadagiti agusar ti peke a vaccination card ken RT-PCR test.
Daytoy ket kalpasan nga indeklarar nga invalid ti junta probinsyal ti inpasa ti konseho ditoy ciudad nga ordinansa para iti pannakaipataw ti pannusa kadagiti maduktalan nga agusar ti peke a vaccination card.
Iti nagbalin a duktal ti Committee on Laws ken Committee on Health ti Sang Panlalawigan, ti pannakaipataw ti pannusa kadagiti agusar ti peke a dokumento ket naipalaon iti Revise Penal Code.
Nupay kasta, kuna ni Lazo a nailanad laeng iti daytoy a ti patawan ti pannusa ket dagiti agusar ti public documents idinto a dagiti aggapo kadagiti public hospitals a dokumento ket maibilang a public documents.
