LAOAG CITY – Nagbalin nga epektibo ti naaprobaran nga ordinansa mainaig iti panangipaay ti preventive protocols ken institutional responsibilities no adda ti bomb threats a maawat dagiti pagadalan, pasdek negosio ken ahensia ti gobierno ditoy siudad ti Laoag.
Daytoy ket kalpasan ti report nga adda ti maipagarup a bomb threat iti maysa a dakkel a mall ditoy siudad ti Laoag partikular iti parking area daytoy.
Segun ken ni Vice Mayor Rey Carlos Fariñas, napintas ti naputar nga ordinansa maipanggep kadagitoy a banag gapu ta saan nga insigida a nagpa-evacuate dagiti otoridad no diket nangiwayatda pay laeng a naimbag ti assessment.
Inbatadna a nasayaat no naiyaplikar iti nasao nga ordinansa gapu ta inpettengna a narigat no iti kada tawag nga adda ti bomb threat ket agpa-evacuate nga insigida a mangitunda iti ad-adda a panag-panic dagiti tattao iti lugar.
Inlawlawagna a babaen ti nasao nga ordinansa ket dakkel a tulong tapno maliklikan ti panag-panic ken dakdakkel a problema no adda ti maawat a bomb threat.
Maipalagip nga inpakaamo ni P/Lt.Col. Ryan Retotar, Hepe ti Laoag City Police Station a saan a bomba ti linaon ti karton iti sirok ti SUV a naka-parking iti dakkel a mall ditoy siudad ti Laoag.
Inlawlawagna nga apaman a linukatan dagiti otoridad ket ditoy a naduktalan a ti linaon ti nasao a karton ket maysa nga endangered species wenno tikka no sadinno a nakaruk-at daytoy.
Innayonna a napagsasaritaanda iti management ti dakkel a mall ditoy siudad ti Laoag ti panangnayon ti Close Circuit Television wenno CCTV camera a maimuntar iti aglawlaw para iti ad-adda pay a seguridad ti publiko.
