LAOAG CITY – Nakumpirmatan ti Bombo Radyo Laoag ti isyu mainaig iti pannakaipasa a dagus ti Appropriations ordinance iti konseho babaen ti Committee of the Whole iti ili ti Paoay idi Lunes.
Naamoan a naipalaon iti ordinansa ti pannakailatang ti pondo para iti pannakai-convert ti kwarta dagiti Leave credits dagiti kwalipikado nga empleado iti lokal a gobierno iti nasao nga ili.
Pinadas ti Bombo Radyo a kasarita ni Konsehal Amador Sadumiano, ti chairman ti Committee on Approriations iti nasao nga ili ngem nagkedked pay laeng daytoy a nagpainterview wenno nangipaay ti komento na mainaig iti daytoy a banag.
Maiyur-uray ti desisyon ti mayor iti nasao nga ili no aprubaran na ti nasao a resolusyon wenno saan.
Immun-una iti daytoy, adda ti naipasa a surat iti konseho manipod iti opisina ti mayor mainaig iti tinawen nga ar-aramiden ti lokal a gobierno pakaseknan ti leave credits dagiti empleado.
Ti leave credits a maipapaay kadagiti empleado ket 15 nga aldaw a vacation leave ken 15 nga aldaw met a sick leave.
