LAOAG CITY – Inpasigurado ni Brgy. Chairwoman Bang Rarangol iti Brgy. Nagpatpatan iti ili ti Solsona a maiyuman kenni Mayor Joseph de Lara iti nasao nga ili ti kalikagumda a pannakaputar ti maysa nga Executive Order.
Daytoy ket seknan iti pannakaipaladan ti swab testing dagiti kabarangayanna a maibilang nga APOR wenno agpapaay ditoy siudad ti Laoag sakbay nga agsubli da iti nasao a barangay.
Segun ken ni Rarangol, addan ti panangiyuman na iti daytoy a banag iti biang ti MDRRMO iti nasao nga ili ken nakaawat met ti pammalubos.
Immuna iti daytoy, inbaga ti kapitan a namunganay ti pannakapanunot na iti swab testing kadagiti APOR gapu ta adda ti maysa a kabarangayanna a kada malpas ti lima nga aldaw a panagtrabaho na ditoy siudad ti panagawid na iti Brgy. Nagpatpatan.
Innayun na a daytoy nga addang ket wagas tapno naan-anay a maprotehiran dagiti kabarangayan na ken mailiklik iti makapatay a coronavirus.
Kabayatanna, inlawlawag ni Dr. Norman Rabago, covid-19 consultant ditoy probinsya a mabalin a nayunan ti maysa a lokal a gobierno dagiti alagaden.
Kuna na a daytoy ket addaan ti pammalubos manipod iti national IATF.
Inbatad na a sakbay a maputar ti alagaden a kalikagum ti barangay ket masapol nga aprubaran daytoy ti mayor ken isuna ti mangiparuk-at ti executive order.
Innayun na a nu met iti siudad ti agkalikagum a mangipatungpal ti sabali pay nga alagaden ket ti gobernador ti probinsya ti mangaprubar.
Kabayatanna, kuna ni Rabago nga ita laeng a nakapuot a maysa a barangay ti agkalikagum a magiyetnag ti maysa nga ordinsa.
