LAOAG CITY – Mangnamnama ni Sang. Panlungsod Bryan Alcid ditoy ciudad ti Laoag, Chairman ti Committee on Transporation nga agbalin a patas ti panaka-ipaay ti prangkisa nangruna kadagiti barangay tricycle franchise.
Daytoy ket namunganay kalpasan a nagbalin daytoy a problema kadagiti sumagmamano a barangay a naikkan ti kanayunan nga slot.
Segun kenni Alcid, iti kaado ti agkalikagom a maaddaan ti franchise ket saandan a maak-akomodar dagitoy.
Kunana nga adalen da a nasayaat, tapno ammu da ti napintas nga aramiden.
Inpetteng ni Alcid a mannarimaan metten ti panankatratar na daytoy iti konseho tapno patas met laeng ti agbalin a desisyon seknan iti daytoy, gapu ta adda dagiti sumagmamano a barangay chairman a kayang-kayat da latta ti ik-ikkan da iti slot.
Innayonna, a rebisaren da nasayaat ti ordinansa para iti naan-anay a panakalawlawag.
Patien met ni Vice Mayor Carlos Fariñas kas chairman ti approving ken spinning committee ditoy ciudad a saan koma a dagiti agkakabagian ti maikkan iti prangkisa, no di ket maiwaras a nasayaat daytoy kadagiti bumarangay.
