LAOAG CITY – Naidunar dagiti sumagmamano nga organs ti bagi ti apoko a lalaki a natay ni Sangguniang Panlalawigan Member Dr. Medeldorf Gaoat kadagiti 8 a pasyente.
Daytoy ti inpakaammo ni Presiding Officer Vice Gov. Cecilia Araneta Marcos kabayatan ti Chairman’s Time ti maika-18 a regular session ti Sangguniang Panlalawigan.
Mainaig iti daytoy, maibasar iti post ti pamilia ti ubing nga agtawen ti tallo a pimmusay iti social media, nagdesisyon dagitoy nga idunar ti viable organs iti akinkannigid a paset ti bagi ti ubing.
Nailanad ditoy a ti kidney ti ubing ket naidunar iti maysa a tao tapno makatulongda nga umatiddog pay ti biag daytoy idinto a ti corneas ti mata ti ubing ket naidunar kadagiti pito pay a sabsabali pay a pasyente tapno maikkanda ti gundaway a makita iti aglawlaw ti lubong.
Nadakamat iti nasao a post a ti apoko ni Bokal Gaoat ti maibilang a kaubingan nga organ donor iti intero a pagilian a Pilipinas ken kaunaan a pedia organ donor iti St. Luke’s Medical Center.
Kabayatanna, saan metten a naipakaammo pay no siasino ken pagnanaedan dagiti nagagasat a pasyente a nakaidunaran dagiti organs ti natay nga ubing.
Iti agdama, inpakaammo ti pamilia ti ubing a nawaya a mapan dumungaw iti Gaoat General Hospital iti Brgy. Ben-agan iti Siudad ti Batac.
Nakamansayag ti bangkay ti ubing agingga inton Nobiembre 21, kalpasanna ket mai-cremate daytoy apaman a malpas ti misa ken maikabil ti abona idiay Estados Unidos.
Naammoan nga adda ti kasingin ti ubing a pimmusay.
