LAOAG CITY – Balligi ti pannakaiwayat ti orientation program iti Special Program for Employment of Students wenno SPES iti gobierno lokal ditoy ciudad ti Laoag.
Daytoy ti inpakaammo ni Ms. Shey Pia Abaya, ti mangidadaulo iti Public Employment Service Office ditoy ciudad.
Kunana nga umabot ti 347 nga estudyante ti mabenepisyaran ditoy ciudad para iti nasao a programa.
Inpakaammo ni Abaya a kabayatan ti orientation ket naipakaammo kadagiti benepisyaryo ti programa dagiti pakaideployan da ken no ania ti rumbeng nga aramiden da.
Inbatad na a dagiti benepisyaryo ket agsweldo ti P575.23 iti kada aldaw wenno pakabuklan nga P11,504.6 a pisos iti uneg ti 20 nga aldaw a panagtrabaho da iti nagduduma nga opisina iti lokal a gobierno ditoy ciudad.
Innayon na ti nasao a programa ket nagbinnuligan ti Department of Labor and Employment, Lokal a gobierno ditoy ciudad ken ti Public Employment Service Office-Laoag.
Mainaig iti daytoy, inrakurak ni Abaya a ti panagtrabaho dagiti benepisyaryo ti Special Program for Employment of Students ket mangrugi intono Abril 13 ita a tawen.
