LAOAG CITY – Inbatad ti United Nations a dagiti ospital idiay Gaza Strip ket agakomudar laeng kadagiti emergencies gapo iti panagkurang ti fuel supply iti nasao a lugar.
Segun iti United Nations, dagiti pasilidad da ket mapunpunnon babaen kadagiti 60 ribo a displaced Palestinians nga agbirbirok ti pagnaedan, no sadinno ti bilang dagitoy ket maminpat a dakdakkel ngem iti kapasidad na.
Kuna met ti Israeli military a ti target da ket dagiti Hamas fighters ken imprastraktura.
Kabayatanna, immapela met dagiti European leaders a maisardeng pay laeng ti rinnupak iti nagbaetan dagiti dua a grupo tapno mapalubusan a sumrek dagiti tulong iti Gaza.
Inpetteng dagitoy a kasapulan unay ita ti “rapid, safe ken unhindered” access kageddan ti panagamak dagiti 27 a European leaders iti humanitarian situation iti ground.
Inlawlawag ni Martin Griffiths a dagiti sibilyan ket rumbeng nga addaan kadagiti kasapulan da tapno agbiag.
Naamoan a ti UN aid agencies ket kinissayan da metten ti operasyon da iti Gaza gapo ta dandani metten maibus ti bukod da a fuel reserves.
