LAOAG CITY – Napaay dagiti otoridad ti South Korea iti panangpadasda a mangarestar ken ni South Korean President Yoon Suk-yeol iti pagtaenganna idiay Seoul.
Daytoy ket kalpasan ti panagsusupiat ti arrest team ken ti presidential security team ni Yoon a nagpaut iti dandani innem nga oras.
Malaksid iti daytoy, nagtitipon pay dagiti suporters ni Yoon iti asideg ti pagtaengan na tapno malapdan ti pannakaarestona.
Segun iti Corruption Investigation Office (CIO) a mangidadaulo iti joint investigation kontra ken ni Yoon, saanda a naiserbi ti arrest warrant kalpasan a na-intercept ida ti 200 a soldado ken presidential security personnel.
Nasurok a 10 a bus ken kotse ti nangserra iti dalan nga agturong iti pagtaengan ti presidente, isu nga imposible a makastrekda iti pasdek.
Gapu iti daytoy, segun iti maysa nga imbestigador ti Corruption Investigation Office, inkeddengda a suspensoen ti pannakaiserbi ti arrest warrant ken ni Yoon gapu iti kinatalged ti kaaduan.
Kinuna pay ti opisina nga adda dagiti sumagmamano a babassit ken dadakkel a riri a napasamak bayat ti panangpadasda a mangtiliw ken ni Pres. Yoon.
