LAOAG CITY – Natiliw ti maysa nga out-of-school-youth babaen ti naiwayat nga anti illegal drug buy bust operation iti Brgy. 16 San Marcos iti ili ti San Nicolas.
Nabigbig ti subject ti operasyon a ni Bryan Sacramento y Palting, agtawen ti 18, dati nga estudyante ti Sta. Rosa Academy, drug personality ken residente iti nasao a barangay.
Basar iti impormasyon manipud iti PNP, Rank No. 10 iti na-revitalized a listaan dagiti Drug Personalities iti Ilocos Norte Police Provincial Office.
Natiliw ni Sacramento kalpasan a nalakuan na ti maysa a pulis a nagpammarang a gumatang ti maipawil a droga partikular iti marijuana a no sadinno a maysa a sachet a naglaon ti maipagarup a napagango a bulong ti marijuana nga agbalor iti sangaribo a pisos.
Malaksid iti daytoy, narekobre pay dagiti otoridad ti dua medium-size transparent heat-sealed plastic sachet a naglaon iti maipagarup a napagango a bulong ti marijuana, 1,000 peso bill a marked money, cellphone, ken dadduma pay a gamit na.
Umabot iti lima a gramo ti napagango a maipagarup a marijuana dagiti nakumpiskar dagiti otoridad iti ikot ti suspek nga agbalur amin dagitoy iti 1,500 a pisos.
