LAOAG CITY – Natiliw ti maysa nga out-of-school-youth babaen ti naiwayat nga anti illegal drug buy bust operation iti Brgy. 16 San Marcos iti ili ti San Nicolas.
Nabigbig ti subject ti operasyon a ni Bryan Sacramento y Palting, agtawen ti 18, dati nga estudyante iti Sat. Rosa Academy, drug personality ken residente iti nasao a barangay.
Basar iti impormasyon manipud iti PNP, Rank No. 10 iti Revitalized Top 10 Illegal Drug Personalities iti Ilocos Norte Police Provincial Office.
Natiliw ni Sacramento kalpasan a nalakuan na ti nagpammarang a gumatang ti iligal a druga iti maysa a sachet a naglaon ti maipagarup a napagango a bulong ti marijuana iti balur ti 1, 000 a pisos.
Malaksid iti daytoy, narekobre dagiti otoridad ti dua medium-size transparent heat-sealed plastic sachet a naglaon ti maipagarup a napagango a bulong ti marijuana, 1,000 peso bill marked money, cellphone, ken dadduma pay a sanikua na.
Umabot iti lima a gramo dagiti nakumpiskar ken agbalur iti 1,500 a pisos.
