LAOAG CITY – Temporario a naipasardeng dagiti outdoor events ti Palarong Pambansa 2025 gapu iti nabara a panawen ditoy Ilocos Norte.
Basar kadagiti opisial ti Palarong Pambansa, naipasardeng dagiti ay-ayam iti oras ti alas-9:01 ti bigat kas panagan-annad iti salun-at dagiti atleta ken naituloy dagitoy iti oras ti alas-4:00 ti malem.
Naammoan a sakbay pay a naipasardeng, sumagmamano nga sporting events ti naisayangkat pakairamanan ti 3000-meter run.
Manipud iti Region 8 wenno Eastern Visayas, nagun-od ni Chrisia Mae Tajarros ti balitok a medalya kalpasan a nakairekord ti oras a 10 a minuto ken 18 a segundo.
Simmaruno met ni Mary Mae Magbanua ti Caraga Region na may nga addaan ti oras a 10 a minuto ken 48 a segundo para iti silver medal idinto a ni Nathalei Faye Miguel ti Region 1 ti nakagun-od ti bronze medal nga addaan ti 10 a minuto ken 50 a segundo.
Naisayangkat ti long jump ken discus throw para iti agpada a boys ken girls category ngem saan pay a nairuar dagiti opisial a resulta dagitoy.
Kabayatanna, nagtuloy met ti qualifying round ti 400-meter dash para iti elementary ken secondary categories.
Segun kadagiti technical officials, napili ti Top 8 nga addaan ti kapaspasan nga oras a limmaban iti final round.
Iti baet ti napudot a paniempo, alisto ti nagbalin a tignay dagiti medical teams kadagiti sumagmamano nga atleta a nakapasar ti sprain ken muscle cramps.
Nupay kasta, awan ti naipadamag a seryoso nga insidente bayat a maisursurat daytoy a damag.
