LAOAG CITY – Nagbalin nga emosyonal ni Outgoing Mayor Chevylle Fariñas ditoy ciudad ti Laoag iti farewell speech na kabayatan ti selebrasyon ti maika-54 a Charter day ditoy ciudad.
Ginundawayan na metten ti nagyaman kadagiti amin nga empleado, kangrunan na dagiti department heads iti gobierno lokal ditoy ciudad ti Laoag.
Inbatad ni Fariñas a maipanakkel na a bayat ti panagtugaw na kas mayor ditoy ciudad ti Laoag ket nalablabes pay ngem ti ninamnama ti kaadoan ti naipaay na a serbisyo.
Innayon na a nakatutuk laeng ti trabaho na kas ina ti ciudad ken uray ti bukod na a pamilya ket saannan a maas-asikaso ken maat-atendaran dagiti napapateg nga okasyon da.
Gapu ti daytoy, inadmitir ti mayor a ti pangibilbilangan kenkuana idi ti asawa na a daydi dati a Vice Mayor Michael Fariñas kas “pinakaboring” a tao gapu ta awan pulos ti oras na tapno agrelax wenno mapan aglang-ay.
Inlawlawag ni Mayor Fariñas a saan a napan nagbakbakasyon kabayatan ti panagtakem na gapu ta agamak amangan no adda ti dumteng a bagyo ken dadduma a trahedya ditoy ciudad ti Laoag.
Inpetteng na a saanna nga ammo no ania ti agbalin a palawag na no apay nga awan ditoy ciudad ti Laoag kabayatan ti kalamidad gapu ta masapol a kanayun nga adda ti ina ti ciudad para kadagiti umili.
