LAOAG CITY – Kiniddaw ni AGRI Party-list Rep. Wilbert Lee ken ni PhilHealth Acting President and Officer-in-Charge Dr. Edwin Mercado a lawlawagen ti reklamo dagiti pasiente mainaig iti napaay a pannakaipatungpal ti Outpatient Emergency Care Benefit (OECB) package.
Iti surat ken ni Mercado ket dinakamt ni Lee a ti OECB package nga epektibo sipod idi Enero ita a tawen ket sakupen dagiti outpatient services and commodities nga inpaay ti philhealth-accredited healthcare facilities iti Emergency Department ken extension facilities-da.
Kuna ni Lee a ti kapada daytoy ket ti diagnostic tests kas ti X-ray, MRI, CT scan ken dadduma pay nga essential emergency services pakairamanan dagiti agas.
Inpetteng ni Lee iti surat a makapadismaya ken saan a nainkalintegan nga iti baet ti opisial a rakurak ti Philhealth mainaig iti Outpatient Emergency Care Benefit package ket saan met maipapaay kadagiti Philhealth members kadagiti amin nga ospital iti intero a pagilian.
Gapu iti daytoy, immapela ni Lee a saan koma nga agbalin a fake news dagiti serbisio iti salun-at ken dagiti benepisio para kadagiti umili a Pilipino.
