LAOAG CITY – Naibutaktak a nangiwayat ti Office of the Vice President (OVP) ni Vice President Sara Duterte ti 111 a disbursement iti uneg laeng ti maysa nga aldaw nga umabot iti P17 milyon manipud iti confidential funds.
Inbatad ni Senator-Judge Francis Pangilinan nga amin a disbursement ket addaan ti petsa a Disiembre 23, 2022.
Inlawlawagna a binilangda a 111, maysa nga aldaw ket addaan ti pakabuklan a 17 a milyon.
Mainaig iti daytoy, idi damo ket saan a makumpirmaran ni Wamil ti bilang. Idi nasaludsod no gagangay ti nasao a disbursement, kunana nga awan ti partikular a probision iti Joint Circular 2015 maipanggep iti daytoy ngem inawaganna daytoy nga “unusual.”
Naammoan a kas paset ti Intelligence and Confidential Funds Audit Office ti Commission on Audit, in-audit ni Wamil ti P500-M confidential funds ti Office of the Vice President ken P112.5-M para iti Department of Education idi sekretario pay laeng ni Duterte.
Basar iti liquidation records, P125-M ti confidential funds ti Office of the Vice President ti na-disburse manipud Disiembre 21 agingga 31, 2022 idinto a kapada a gatad ti inparuk-at iti umuna a tallo a quarter ti 2023.
Naobserbaran pay ni Pangilinan nga amin nga acknowledgment receipts nga insubmitir ti Office of the Vice President ket buo ti numero – P250,000 wenno P500,000 – ken awan ti butal wenno sentimo daytoy.
