LAOAG CITY – Inbatad ti pannakangiwat ti House prosecution ken ni Lanao del Sur Rep. Zia Alonto Adiong, a saan koma a namnamaen ti Office of the Vice President (OVP) a maipaayan iti espesial a pannakatrato dagiti auditor ti estado iti panangireportna iti panagusar na ti confidential funds.
Segun ken ni Adiong, saan a mabalin a pagkedkedan ti OVP dagiti pagannurotan ti Commission on Audit (COA) gapu ta kompidensial dagiti transaksion, kuna ti mammanday-linteg, ken innayonna a dagiti met laeng auditing standards ti maipatungpal kadagiti dadduma nga ahensia ti gobierno.
Daytoy ket kalpasan ti testimonia ni COA state auditor Xylene Del Campo iti sango ti Senate Impeachment Court no sadino a bayat ti cross examination, impatalged ti depensa a saan a karaman ti Joint Circular ti kiddaw ti COA para kadagiti kanayonan a dokumento, pakairamanan dagiti resibo, a sursuroten kas pagalagadan iti pannakausar dagiti kompidensial a pondo.
Inpetteng ni Adiong a sursuroten laeng ti COA ti regular auditing standards a naipatungpal saan laeng nga iti OVP ken DepEd no di pay ket kadagiti dadduma nga ahensia.
Impaganetgetna a masapul a tungpalen ti OVP dagiti isu met laeng a requirements a kasapulan kadagiti dadduma nga ahensia nga adda iti audit ti Intelligence and Confidential Fund Audit Office (ICFAO).
Nagkedked met ni Adiong ti argumento a ti panagkiddaw iti resibo para kadagiti nagatang ket kayatna a sawen ti panangibutaktal iti kinasiasino dagiti confidential informats. Inbatad na nga ipaayan laeng ti COA ti gundaway ti ahensia a mangidatag ti pammaneknek kadagiti madama a transaksyon.
Inyunay-unayna pay a napateg ti kaadda dagiti mangsuporta a dokumento nangruna no nausar ti donfidential funds kas reward wenno pannakagunguna.
