LAOAG CITY – Agtultuloy a maag-agasan iti Governor Roque Ablan Senior Memorial Hospital (GRASMH) ditoy ciudad ti Laoag dagiti biktima ti napasamak a desgrasya iti Barangay Lubnac iti ili ti Vintar.
Iti imbestigasyon ti PNP-Vintar, kabayatan ti panagpapalaud a direksyon ti Owner jeep nga inturong ni Jayford Nagtalon, agtawen ti 34, ket nag-overshoot ken idi madanun na ti kurbaan a paset ti kalsada ket ditoyen a nasapgud na ti agpadpadaya a direksyon nga e-bike nga inturong ni Didema Borja, agtawen ti 60, agpada dagitoy a residente iti nadakamat a barangay.
Kalpasan a nasapgud ni Nagtalon ti e-bike ket ibaw-ing na pay lang ti lugan rason a nagderderestso agingga a natennag iti kanal.
Gapu iti daytoy, nadunor ti akin-kannawan a kiday kiday ni Nagtalon idinto a nadait met ti ulo ni Borja.
