LAOAG CITY – Inpakammo no Mr. Khristian Paul Maglaya, Labor Communications Officer iti OWWA Region 1 a nangrugin ti panagawat da kadagiti aplikante para iti Education Development Scholarship Program ken ti Congressional Migrant Workers Scholarship Program.
Segun kenni Maglaya, idi pay Enero 9 ket nagawat dan para iti online application para iti Grade 12 students wenno sumrek kas freshman iti kolehiyo nga anak wenno kabsat ti OFW.
Inlawlawag na a masapol a dagiti aplikante ket makapasa met laeng iti qualifying examination tapno maikkan da ti 60 a ribo a financial assistance iti kada school year.
Inpetteng na a masapol a dagiti OFW ket aktibo a miembro iti OWWA wenno addaan ti Active OWWA membership, ken awan ti bayad na wenno awan ti masingir a processing fee, ken uray kasano kabayag nan nga agpapaay iti sabali a pagilyan.
Mainaig iti daytoy, kunana a dagiti maala iti daytoy ket masapol a mamentenir da ti 80% a general average ken iti kada malpas ti semester ket adda ti isubmitir na a requirements kas iti certification iti grades manipud iti pagadalan para iti evaluation.
Dinakamat na a dagiti kwalipikado ket suportaran ti OWWA agingga nga agturpos uray anya a kurso ti alaen da.
Kabayatanna, kuna ni Maglaya a ti mabenipisyaran iti daytoy a program ket ti Top 400 nga ageksamin iti intero a pagilyan.
Agpatingga met ti panagawat da kadgaiti aplikante intono Enero 31, 2023.
