LAOAG CITY – Nangrugin a nagibunong ti Overseas Workers Welfare Administration (OWWA) babaen ti superbisyon ti Department of Labor and Employment (DOLE) ti sag-10 ribo a pisos kadagiti OFW nga apektado ti COVID 19 pandemic.
Daytoy ti inbatad ni Mrs. Geraldine Salazar Lucero, communication officer ti OWWA Region 1.
Inlawlawagna a ti pannakaited ti nasao a gatad ket babaen ti remittance ken dagiti saan pay a nakaala ket mabalin da ti agaplikar babaen ti online.
Mainaig kadayta, inlawlawag ni Lucero dagiti pagalagadan no siasinno dagiti mabalin a manggundaway iti nasao a programa.
Karaman ditoy dagiti OFW a saan a nakasubli gapu iti pannakaipatungpal ti lockdown kadagiti pagilian a pagtrabahoan da, napagawid ditoy pagilyan gapu iti COVID 19, ken napukawan ti trabaho gapu iti mapaspasaran a krisis.
Inpakaammo ni Lucero a saan a karaman iti nasao a programa dagiti mapan koma pay laeng iti abroad.
