LAOAG CITY – Inakusaran ni dati a Police Colonel Eduardo Acierto ni dati a Pres. Rodrigo Duterte a “protector” kadagiti suspected a drug lords a da Michael Yang a dati a presidential adviser ken ti negosiante a ni Allan Lim a pagaammo itan kas Lin Weixiong.
Iti panagparang ni Acierto iti House Quad Committee hearing idi kalman, kinunana a nasinged nga agpapagayam da Yang, Lim ken Duterte.
Idi 2017, inurnong ti grupo ni Acierto dagiti dokumento ken ebidensya a da Yang ken Lim ket adda pakainaigan da iti illegal a droga.
Malaksid iti daytoy, inpalgak ni Acierto nga addaan ni Yang iti secret laboratory ti shabu idiay Dumoy, Davao City.
Basar iti drug matrix nga insagana ti grupo ni Acierto, ni Yang ket kameng ti Johnson Chua drug syndicate nga idauluan ti Johnson Co a nakabase iti mainland China.
Idinto a ni Lim ti mangtartarawidwid iti clandestine laboratory idiay Cavite a rinaut ti Philippine Drug Enforcement Agency (PDEA) idi Hulio 2018.
Kinuna ni Acierto a nairaman ti nadakamat a matrix iti insubmitirna ken ni dati a hepe ti PNP a ni Ronald Dela Rosa ken dati a PDEA Director General Aaron Aquino ken dati a PNP Chief Oscar Albayalde.
Kabayatanna, naiget nga inlibak ni dati a PDEA Dir. Gen. Wilkins Villanueva nga awan ti agparang a nagan ni Michael Yang iti listaan dagiti nairaman iti illegal a droga.
