LAOAG CITY – Nagpalagip ni Police Major Kristian Lee Badua, hepe ti Philippine National Police (PNP) Piddig ken dati a pannakangiwat ti Ilocos Norte Police Provincial Office (INPPO) iti umno a panagusar ti paltog.
Daytoy ket kageddan ti direktiba ni Philippine National Police (PNP) chief Gen. Jose Melencio Nartatez Jr., a masapul a masigurado a natalged ken saan a magaw-at dagiti ubbing ti paltog kalpasan ti napasamak a shooting incident idiay Ateneo de Zamboanga University kasta payen iti Tacloban City no sadinno a ti nagpaputok ket agpada a menor de edad.
Kuna ni Badua nga adda ti standard safety protocol kadagiti agtagikua ti paltog, no sadinno a nagadagsen ti sangoen a pannusa ti siasinno man nga aglabsing, no kameng man ti pulis wenno ti pribado nga agtagikua.
Naiget ti nasao a protocol gapu ta no mapaneknekan a naglabsing ket mabalin a sumango ti administrative case wenno nagduduma a criminal charges.
Inbatadna a mabalin a maikkat ti Philippine National Police (PNP) member ken maikkat manipud iti serbisio.
Inlawlawagna nga adda ti inpaay ti Philippine National Police (PNP) a plastic vault para iti nataltalged a pannakaidulin dagiti paltog da ngem kunana a no adda ti plano ti maysa a miembro a nayonan ti paltogda ket nasaysayaat nga idulinda daytoy iti vault nga adda tulbekna wenno ti saan nga ammo ti miembro ti pamilia.
Kinunana a no ad-ado ti paltog ti maysa nga indibidual, miembro man ti Philippine National Police (PNP) wenno saan, ket dakdakkel ti requirements-na iti babaen ti Republic Act 10591 wenno ti Comprehensive Firearms and Ammunition Regulation Act.
