LAOAG CITY – Inpaayan ti pammadayaw ti Ilocos Norte Police Provincial Office ni P/MSg. Razel Go a kameng ti Pinili Municipal Police Station kabayatan ti kick off ceremony ti Women’s Month Celebration.
Daytoy ti inpakaammo ni P/Maj. Kristian Lee Badua, pannakangiwat ti Ilocos Norte Police Provincial Office.
Segun kenkuana, daytoy ket kas pammigbig gapu iti exemplary humanitarian act nga inaramid ni Go kalpasan a saan a nagpangadua a nangpa-breastfeed iti maladaga kabayatan ti barangay visitation-da iti ili ti Pinili.
Maipalagip nga inbatad ni P/MSg. Go nga iti panagturongda iti maysa a pagtaengan ket adda ti maladaga nga agsangsangit ken kas ti makunkuna a ‘mother’s instinct’ ket ammona a mabisin ti ubing.
Kunana nga iti pannakisaritada iti lola ti ubing ket naammoanda nga awan ti inana gapu ta adda ti inasikasona iti ruar.
Gapu iti daytoy, inbatad ni Go a kinasaritana nga immuna ti lola ti ubing sakbay a pina-breastfeed-na daytoy.
Kuna ni Go nga adda met ti 10 a bulan pay laeng nga anakna isut gapuna nga adu ti gatasna.
Innayonna a daytoy ti damo nga adda ti pina-breastfeed-na a saanna nga anak.
