LAOAG CITY – Agsentro ti imatang ti Provincial Veterinary Office ti panaglako ti karne ti baboy babaen iti online.
Daytoy ti inpakaammo ni Dr. Loida Valenzuela, Provincial Veterinarian ditoy probinsia.
Kuna na a wagas daytoy tapno maipasigurado nga awan ti African Swine Fever ditoy probinsia.
Inadmitirna a saan da ammo no kasano a makontrol dagiti aglaklako ti karne ti baboy babaen iti online ngem no pay kasta ket inpasiguradona nga adda ti ar-aramidenda nga addang babaen ti tulong dagiti sumagmamano nga ahensia ti gobyerno tapno maliklikan a maapektaran dagiti taraken a baboy ditoy probinsia iti ASF virus.
Gapu iti daytoy, maplanplano dagiti wagas ken addang a maaramid tapno mamonitor ti panaglako ti karne ti baboy babaen iti online.
Awan met pay ti nalawag a proseso no kasano nga iyimplementar ti Provincial Veterinary Office ti panangmonitorda kadagiti aglaklako iti online.
Malaksid iti daytoy, kuna ni Dr. Valenzuela a mapaigetan ti maipatpatungpal a pagalagadan kadagiti border control ditoy probinsia iti panagpastrek kadagiti karne ti baboy ditoy probinsia.
Innayon ti Provincial Veterinarian a malaksid laeng ditoy Ilocos Norte ket iti probinsia ti Apayao ken Batanes ti nagtalinaed nga awanan ti African Swine Fever ditoy amianan a Luzon.
