LAOAG CITY – Inlawlawag ni INEC General Manager Felino Herbert “Bing” Agdigos ti panagbaba ti singir ti kuryente iti P1.11.
Segun ken ni Agdigos adda ti nagbalin a re-negotiation iti Masinloc power partner nu sadino a nakiddaw a maipababa ti contract capacity.
Kuna na a daytoy ket manipod iti 51 megawatt ken agbalin a 25 megawatt tapno ad-ado ti magatang iti stock market sipud ta nababba ti presyo a lako ti kuryente.
Inbunannag ni Agdigos a dati a 37 agingga iti 51 megawatt a magatang iti Masinloc ket isu ti nakaipalaon iti kontrata wenno 7%-100%.
Mainaig iti daytoy, inbatad na a 25 a megawatt laeng ti nagbabaan gapu ta daytoy ti minimum a mabalin a mangpaandar iti planta.
Kabayatanna, inbatad ni Agdigos nga awan ti nabalusingsing iti kontrata ngem maisubli ti dati a 51 megawatts nga aggapo iti Masinloc apaman a bumaba ti presyo ti coal.
Kuna ni Agdigos a mabalin a gumatang ti kooperatiba iti sabali a power supplier ngem masapol a dumalan iti competitive collection wenno selection process.
Inlawlawag na nga amin met a garaw ti kooperatiba ket adda iti babaen ti regulation ti Energy Regulatory Comission (ERC).
Maipalagip a ti singir iti kuryente iti napalabas a bulan ket nasurok a 18.67 a pisos ken manamnama a 17.56 a pisos ita a bulan.
