LAOAG CITY – Nakurakot laeng ti P1.3 trilyon ti nailatang a pundo ti gobierno iti flood control projects manipud idi 2021.
Daytoy ti inrakurak ni Bagong Henerasyon party-list Rep. Robert Nazal mainaig iti kumarkaro a korapsion a nakairamramanan dagiti sumagmamano nga opisial ti Department of Public Works and Highways (DPWH), dagiti kontraktor ken dagiti sumagmamano a pulitiko a maipagarup a nagkunsabo.
Inbatad ni Nazal a nasken laeng a maammoan no sadinno ti nakaikabilan ti tunggal sentimo ti P1.3 trilyon a pundo ken isubli ti kuarta ti gobierno ken pagsungbaten dagiti adda iti likudan kadagiti palpak a proyekto.
Kunana a kadagiti naglabas a tawen ket agsinnungbangir dagiti proyekto ti Department of Public Works and Highways ngem saan met latta a nasolbar ti problema iti panaglayos.
Inpasingked ni Herrera iti Kongreso a saan laeng daytoy nga isyu ti “power of the purse” no diket kasapulan a siguradoen a mapagsungbat iti linteg dagiti amin a karaman iti panagkunniber ti pundo.
