LAOAG CITY – Nakumpiskar ti Bureau of Customs (BOC) ti P1.4 bilyon a balor ti smuggled luxury cars manipud kadagiti warehouse idiay Pasay ken Parañaque City.
Karaman kadagiti nakumpiskar idi Pebrero 13 ti nagduduma a nababalor a brand ti lugan ken dadduma pay nga sports cars.
Basar iti Bureau of Customs, nakitada dagiti lugan kalpasan a nakaawat ti impormasion a mailaklako dagitoy iti babaen ti online.
Inbatad ni Bureau of Customs Commissioner Bien Rubio a daytoy ket maysa a ballaag kadagiti importer a saan a natalged uray nakaruaren iti naggapoan dagiti produkto.
Naammoan a ti akinkukua ti warehouse ket naikkan ti 15 nga aldaw tapno agisubmitir kadagiti dokumento a mangipaneknek ti umiso a panagbayad ti buis ken taripa.
Kabayatanna, no awan ti maipakitana ket sumango iti kaso iti babaen ti Customs Modernization and Tariff Act.
