LAOAG CITY – Inlungalong ni Batangas 1st District Rep. Leandro Legarda Leviste a maipaayan ti P1,000 allowance dagiti amin a Pilipino nga estudiante manipud iti kindergarten, elementaria, sekondaria ken pakairamanan ti kolehio iti intero a pagilian tapno makatulong iti pinansial a gastosen.
Daytoy ket kagiddan ti panangipila ni Leviste, agtawen ti 32, kaubingan a bilyonaryo nga entrepreneur ditoy Pilipinas ti House Bill No. 27 wenno An Act Establishing A National Student Program Act.
Inbatad ni Leviste nga ipangpangrunana iti umas-asideg a deliberasion ti 2026 national budget iti Kongreso ti panangilatang ti dakdakkel a pundo iti Department of Education tapno maipaayan ti P1,000 allowance dagiti estudiante gapu ta napateg ti edukasion iti panagdur-as ken masakbayan dagiti sumarsaruno nga henerasion.
Naammoan a nangipaay ni Leviste ti sag-P1,000 allowance iti agarup 150 a ribu nga estudiante iti umuna a distrito ti Batangas iti “zero government cost” wenno manipud iti bukudna a bulsa.
Basar kadagiti agad-adal, nagannak ken mangisursuro iti Balayan National High School, ni Leviste ti kaunaan a Kongresista nga immasideg iti publiko tapno personal a maiyawat ti tulong manipud iti bukudna a bulsa.
