LAOAG CITY – Makaawat ti 100 a ribo a pisos a nayon a pondo para iti serbiso medical iti Mariano Marcos Memorial Hospital and Medical Center iti siudad ti Batac.
Ti nasao a kantidad ket aggapo kenni Ms. Mary Ang, ti Provincial President iti Non-Goverment Organization.
Segun kenni Ang, ado pay dagiti kasapolan iti nasao nga ospital isut gapuna a sidadaan latta daytoy a mangipaay ti suporta.
Inbatad na a ti idonar na a 100 a ribo a pisos ket nayon a pondo iti Mariano Marcos Memorial Hospital and Medical Center ken mausar daytoy para iti panaggatang kadagiti medisina, nagduduma a ramit ken dadduma pay a kasapolan iti nasao nga ospital.
Kagiddan daytoy, kunana a nupay napateg ti pannakapasayaat dagiti pasilidad ken panaggatang kadagiti ramit, para kenkuana ket napatpateg dagiti agserbi a personnel a pakairamanan dagiti doctor.
Mainaig iti daytoy, kuna ni Ang a kas maysa nga agserserbi kadagiti agkasapolan ti tulong ket ammo na no kasano ti kinapateg a maaddaan dagiti maseknan ti libre a medisina ken serbisyo, kangrunaan na dagiti marigrigat ken dagiti senior citizen.
