LAOAG CITY – Inbatad ni Mayor Edmar Vincent Bonoan iti ili ti San Nicolas nga umabot iti 150 a milyon a pisos ti utang ti munisipyo iti babaen ti napalabas nga administrasyon.
Segun kenkuana, sumuruk-kumurang a dua a milyon a pisos ti bayadan da iti kada bolan iti uneg ti 15 a tawen.
Kuna na a ti maysa kadagiti prayoridad ti administrasyon na ket ti pannakabayad ti utang ti munisipyo.
Inrakurak na nga awan pay ti nailatang a pondo a pagpatakder da iti baro a munisipyo ti ili ti San Nicolas isut gapuna a saan dan nga ituloy ti proyekto.
Kuna na a ti lote a pakaipatakderan koma ti baro a munisipyo ti ili ti San Nicolas ket pinaraepan na laengen iti Agriculture Office tapno adda ti nayun a pagbayad da ti utang.
Kabayatanna, inpakaammo ti mayor a ti maysa pay a naduktalan na iti panagtugaw na ket ti namnaminsan a pannakairuwar ti 200 a milyon a pisos manipod iti 261 a milyon a pisos a savings ti munisipyo.
Inpalgak na a naamoan na daytoy babaen dagiti dokumento iti uneg ti munisipyo no sadinno a ti nairuwar a pondo ket naikabil iti General Funds.
Masdaaw ni Mayor Bonoan no apay nga immutang paylaeng ti napalabas nga administrasyon ti 150 a milyon a pisos nga inggatang da ti lote idinto nga adda met ti makaumanay a pinagbayad da koma manipod iti savings ti munisipyo.
