LAOAG CITY – Dumanon iti P16.3 bilyon ti ikidkiddaw a pundo ti National Food Authority para iti panaggatang ti irik inton 2025.
Segun ken ni National Food Authority Acting Administrator Larry Lacson, ti nasao a pundo ket tapno magun-od ti kaadu ti target volume para iti national buffer stock ken iti nayon a pundo para iti panag-upgrade ti storage capacity daytoy.
Inbatadna a malaksid iti panagpundo iti panaggatang ti irik manipod kadagiti lokal a mannalon, masapolen a mangipasdek ti kanayonan a pasilidad iti pannakaipenpen ken panangiyurnos ti drying facilities tapno mapasayaat ti buffer stocking.
Iti agdama, ti National Food Authority ket addaan ti kapasidad laeng nga agbilag ti 31 a ribu a metriko tonelada ngem gumatgatang ti nasurok-kumurang 495 a ribu a metriko tonelada nga irik.
Iti nailungalong a pundo ti Department of Agriculture para inton 2025, P24.85 bilyon ti nailatang para iti National Food Authority a nangatngato ti 77 a porsiento iti P14.03 bilyon ita a tawen.
Ti pundo para ita a tawen, P9 bilyon ti naiyalokar para iti panaggatang ti irik ti National Food Authority nga addaan ti assumed procurement price a P23 iti kada kilo.
Kabayatanna, mapagsasaritaan pay laeng iti Kongreso no isubli ti bileg ti National Food Authority nga agangkat ti bagas wenno mangituding ti presio iti merkado.
Sumagmamano a senador ti nangkiddaw nga ipaay latta daytoyen iti Department of Agriculture ti nasao a bileg.
