LAOAG CITY – Mapapati a dumanon iti ₱180 billion ti naikabil kadagiti ghost flood control projects manipud pay idi 2016.
Daytoy ti inrakurak ni Senate President pro-tempore Ping Lacson iti inaramidda a pattapatta ni Senate Committee on Finance Chairman Sherwin Gatchalian kalpasan a rimmuar nga adda ti sumurok-kumurang 600 ti naduktalan a ghost flood control projects manipud iti ininspeksion a sumurok-kumurang a 10 a ribu a proyekto.
Inpetteng ni Lacson, iti ₱180 billion a napukaw para laeng iti ghost flood control projects, saan pay a karaman ditoy dagiti substandard projects.
Gapu iti daytoy, ti inimbestigaran ti Senate Blue Ribbon Committee ket bassit laeng no idasig iti pakabuklan a bilang dagiti posible a ghost flood projects.
Kunana a ti insubli a ₱110 million ni dati a Department of Public Works and Highways (DPWH) district engineer Henry Alcantara ket bassit laeng uray isublina pay ti nayon a ₱200 million kadagiti sumarsaruno a lawas.
Innayon pay ni Lacson, nakasagana ti Blue Ribbon Committee a tumulong iti Independent Commission for Infrastructure (ICI), Department of Justice (DOJ) ken iti Office of the Ombudsman mainaig iti panangipila ti kaso kontra kadagiti karaman no bilang makaawatda kadagiti baro nga impormasion.
