LAOAG CITY – Nangilatang ti gobierno ti P1 billion iti University of the Philippines (UP) System tapno mapapigsa ti Project NOAH ken tumulong iti nasapsapa a pannakaammo kadagiti layus ken dadduma pay a peggad iti didigra.
Segun kenni Presidential Communications Office (PCO) Undersecretary ken Palace Press Officer Claire Castro, inbilin ni Presidente Ferdinand R. Marcos Jr. ti Department of Budget and Management (DBM) a mangiruar iti pondo tapno mapapigsa ti proyekto babaen ti artificial intelligence (AI), real-time hazard monitoring ken flood forecasting.
Iti dagup a pondo, P935 million ket para iti research services idinto a P65 million ket para iti project management ken administration. Mausar pay daytoy para kadagiti kasapulan a ramit, teknolohia ken eksperto.
Iti babaen ti AI-enhanced modeling, LiDAR (Light Detection and Ranging) mapping ken data analytics, makaipaay ti Project NOAH iti real-time nga impormasion ken prediksion maipapan iti posible a layus ken dadduma pay a peggad.
