LAOAG CITY – Maestablisar ti agbalor dua punto lima a milyon (2.5M) a pisos a pagtaraknan ti baka iti Brgy. San Lorenzo iti ili ti San Nicolas.
Segun iti Local Chief Executive, nagkiddaw da iti gobierno probinsyal ti pondo ngem indalan ti gobernador iti Department of Agriculture Region 1 babaen ti Livestock Econoic Enterprise Development (LEED) program.
Malaksid ti imprastraktura, karaman a pakailatangan ti nasao a pondo ti 25 a baka, maysa a Forage Chopper, 46 a plastic drums, 25 a bag ti feeds ken veterinary supply.
Innayon ti mayor iti nasao nga ili a no malpas daytoy ket sumaruno a pondoan da ti maigatang ti nayon dagiti baka a taraknen ken paadwen dagiti miembro ti San Nicolas Hog raisers and livestock Association Inc.
Mainaig iti daytoy, inpasigurado ti lokal a gobierno nga itultuloy da ti mangsuporta iti nasao a grupo nangruna kadagiti naapektaran ti African Swine Fever outbreak iti nasao nga ili.
