LAOAG CITY – Dumanon iti dua a milyon a pisos ti balor ti nadadael iti benneg ti imprastraktura iti ili ti Adams.
Segun ken ni Mayor Rosalia Dupagen iti nasao nga ili, manarimaan pay laeng ti pannakaukkon ti datos ti Municipal Agriculture Office no mano ti balor ti nadadael iti benneg ti agrikultura.
Inbatadna a nadadael dagiti mulada a rambutan, abukado, saba, mangga ken dadduma pay gapu iti kinapigsa ti tudo ken angin nga intunda ti Super Typhoon Carina.
Inlawlawagna a dagiti pay laeng single motor ti mabalin a makadalyasat iti Sitio Bucarot idinto nga adda met ti nadalapus a proyekto imprastraktura.
Innayonna nga adda pay laeng dagiti sumagmamano a residente a nagtalinaed iti evacuation center gapu ta saan pay a nages-es ti danum kadagiti lugarda.
