LAOAG CITY – Madanagan ni Senador Joel Villanueva a posible nga agtennag laeng iti panag-veto ni Presidente Ferdinand Marcos Jr. no adaptaren ti Senado ti inaprobaran a P200 Wage Hike Bill ti Kamara.
Inbatad ni Villanueva no kitaen ket al-alisto ken ad-adda a praktikal no ti P100 a nayon a sueldo kadagiti pribado sektor nga inpasa ti Senado nga aprobaran ti Bicameral Conference Committee.
Inlawlawagna a kasapulan a kitaen ti amin nga aspeto gapu ta ilunglungalong ti Kamara ti P200 a nayon iti sueldo tapno naan-anayen a ma-veto ti Presidente ken saan met a matuloy ti P100 a wage increase ti Senado.
Kalikagum ni Villanueva a makita iti pangibasaran ti panagadal ti Kamara iti mailunglungalong a P200 wage hike nangruna iti aspeto no kabaelan daytoy dagiti employer.
Kunana nga iti bersion ti Senado a dimmalan daytoy ti panagadal ken konsultasion kadagiti employer ken sektor.
Kabayatanna, ti pakadanagan pay ti Senador, no saan a mapirmaan ni Presidente Marcos ti linteg ket sigurado a ti Presidente ti rummuar a kontrabida maipapan iti daytoy.
