LAOAG CITY – Umab-abot iti P24.4 bilyon a pisos ti balor ti bagas a masaysayang iti Pilipinas iti kada tawen gapu kadagiti tidda nga inapoy a maibelbelleng.
Daytoy ket basar iti Philippine Rice Research Institute (PhilRice).
Iti datos nga iparuk-at ti Department of Agriculture (DA), mapatta-patta nga adda ti dua a kutsara nga inapoy iti kada aldaw ti masaysayang ti kada Pilipino, no sadinno a no pagtitipunen dagitoy ket katukad ti sumuruk-kumurang a 10.85 milyon a sako ti bagas iti kada tawen.
Segun iti Department of Agriculture, umdas koma ti nasao a kaado dagiti masaysayang nga inapoy tapno mapakan ti mapatta-patta a 5.17 milyon a Pilipino iti uneg ti maysa a tawen.
Gapu iti daytoy, kalikagom ti Department of Agriculture ken Philippine Rice Research Institute a mapapigsa ti “Be RICEponsible campaign”, a manggutgutigot iti publiko a mangala laeng ti kabaelan nga ibusen, suportaran ti lokal a bagas ken agpili iti nasustansya a rice products.
Ginutigot pay ti Department of Agriculture dagiti aggatang a suportaran ti locally produced rice, karaman ti PhilGAP-certified products, kasta met ti brown, pigmented, low-glycemic index ken high-zinc rice.
Itantandudo pay ti kampanya ti pannakaipatungpal manen ti Half-Cup Rice Ordinance kadagiti masakupan a lugar tapno magutigot dagiti restaurant a mangidiaya ti basbassit a serving ken makissayan dagiti masaysayang a taraon.
