LAOAG CITY – Mangrugin ita nga aldaw ti Biernes, Hulio 5 ti Department of Agriculture (DA) a mailako ti agbalor P29 iti kada kilo ti bagas iti 10 a napili a Kadiwa centers idiay Metro Manila ken Bulacan iti babaen ti Program 29 ti gobierno.
Segun ken ni Agriculture Assistant Secretary Genevieve Velicaria-Guevarra, dagiti Kadiwa sites nga aglako ti nalaka a bagas ket mabirukan iti Bureau of Animal Industry ken National Irrigation Administration idiay Quezon City; Bureau of Plant Industry iti Manila; Food Terminal Inc. idiay Taguig City; Philippine Fiber Industry Development Authority idiay Las Piñas; Caloocan City; Valenzuela City; Brgy. Fortune ken BF City (BFCT) idiay Marikina City pakairamanan idiay San Jose del Monte City idiay Bulacan.
Inbatad ni Guevarra, ti mailako a nalaka a bagas ket maiyalokar para kadagiti 6.9 a milyon a vulnerable households wenno dumanon iti 35 a milyon a Pilipino pakairamanan dagiti senior citizens, single parents, persons with disabilities ken benepisiario ti Pamilyang Pilipino Program (4Ps) ti gobierno.
Ti tunggal benepisiario ket mapalubusan a makagatang ti 10 a kilo ti bagas iti kada bulan no sadino kasapulan laeng a mangipakita ti ID ken mangitugot ti reusable containers wenno bags a pangikabilan ti gatangen a bagas.
