LAOAG CITY –Mangilatang ti administrasion ni Marcos ti kanayonan a P300 milyon a pondo tapno makumpleto ti construction ti Bukidnon Airport iti Don Carlos, Bukidnon inton umay a 2027.
Personal nga ininspeksion ni Executive Secretary Ralph Recto ti agdama a konstruksion ti eropuerto iti Barangay Maraymaray.
Segun ken ni Recto, gagem ni Presidente Ferdinand Marcos Jr. a maileppas ti proyekto tapno makatulong daytoy iti trabaho, makaallukoy ti investors ken ad-ado a turista.
Adda pakabuklan a P3.17 bilyo a pondo ti eropuerto a pakairamanan ti P1.36 bilyon manipud iti administrasion ni Marcos.
No mainayon ti naipila a P300 milyon, umabot iti P1.66 bilyon ti pakabuklan ti pondo nga ilatang ti administrasion.
Ti nasao nga airport ket addaan pakabuklan a 2,100 metro a runway a kabaelanna ti umawat ti dadakkel a commercial aircraft kas ti Airbus A320.
Addaan pay daytoy ti passenger terminl a kabaelanna ti umawat agingga 425 a pasaheros.
Manamnama pay a mapaalisto ti eropuerto ti panagbiahe kadagiti produkto ti Bukidnon kas ti pinya, saba, mais, kape, asukar, ken livestock nga agturong iti dadakkel a mercado.
