LAOAG CITY – Nangilatang ti Ilocos Norte ti agarup 305 a milyon a grant manipod iti People’s Survival Fund a mausar a pangsupusop kadagiti proyekto iti Sustainable Agriculture ken Natural Resource Management iti sumaruno a lima a tawen.
Pinasingkedan daytoy Mr. Hashler Garalde, ti Social and Environmental Safeguard Focal Person ti gobierno probinsial, kabayatan ti panangibinsabinsana kadagiti project proposal nga indasarna iti Climate Change Commission a nangitunda iti pannakaaprobar ti pundo.
Kunana a maragsakan gapu ta naaprobaran ti nasao a project proposal babaen ti pundo manipod iti gobierno probinsial.
Inpannakkelna a dakkel a tulong daytoy tapno matungpal ti panangikagumaan a mangbangon iti ad-adu pay a babassit a proyekto a pagurnungan ti danum tapno maaddaan ti alternatibo a sistema iti irigasion ken dadduma pay.
Mainaig iti daytoy, nagsasaruno ti assessment iti singasing ti probinsia iti Board Secretariat ken Board Member Agencies ti People’s Survival Fund tapno masigurado a ti proyekto ket agtungpal kadagiti climate-responsive standards nga inkeddeng ti ahensia.
Nangisayangkat pay dagiti pannakabagi ti Climate Change Commission ti tallo nga aldaw nga appraisal ditoy probinsia tapno ma-validate dagiti report a mangapektar iti probinsia gapu iti Climate Change.
Malaksid iti daytoy, naputar babaen ti Republic Act 10174 idi 2012 ti People’s Survival Fund ket addaan ti umuna a kapitalisasion ti PHP1 bilyon tapno mapundoan dagiti programa ti panagadaptasion ken proyekto dagiti yunit ti lokal a gobierno ken dagiti akreditado a lokal ken komunidad nga organisasion.
Kabayatanna, daytoy ti umuna a gundaway a naikkan ti probinsia ti pundo iti babaen ti People’s Survival Fund.
