LAOAG CITY – Umabot iti nasurok-kumurang P4,400,000 ti balor iti nadadael nga High Value Crops ditoy Ilocos Norte gapu iti epekto ti El Niño phenomenon.
Daytoy ti inpakaammo ni Engr. Chito Baldovi iti Officer In Charge ti Provincial Agriculture Office.
Inlawlawagna nga adda ti kalawa a 37 nga ektarya ti naapektaran gapu iti panawen ti mapaspasaran a tikag.
Inbatadna a dagiti kangrunaan a naapektaran a lugar ket iti siudad ti Batac ken iti ili ti Banna pakairamanan iti ili ti Piddig no sadino umabot iti 20 nga ektarya iti naapekataran.
Kunana a daytoy a nairekord iti ili ti Piddig ket isu iti kalawaan ket ad-adu nga high value crops ti nadadael gapu iti El Nino phenomenon.
Mainaig iti daytoy, inlawlawagna a no maipanggep iti panagmula iti High Value Crops ket al-alisto a pagbiagen gapu ta basbassit ti danom ti masapol.
Innayonna nga adda ti epektona iti panawen ti kalgaw ti panagngato ti presio kadagiti natnateng ditoy probinsia.
Kabayatanna, naammoan nga agtultuloy ti panagibunong ti Provincial Agriculture Office ti tulong kas fuel subsidy, water pumps, vegetable seeds and uria with complete fertilizer kadagiti mannalon a naapekataran iti El Nino phenomenon.
