LAOAG CITY – Inaprobaranen ti Sangguniang Panlalawigan ti lima a pisos a pannakaipangato ti plete ti tricycle iti ili ti Sarrat.
Gapu iti daytoy, manipud iti 20 a pisos a minimum wenno regular fare para iti umuna a kilometro ket agbalinen a 25 a pisos para iti sumaruno a kilometro idinto a dagiti estudiante, senior citizens ken person’s with disability ket addaan ti 20 a porsiento a diskuento a manipud iti 16 a pisos a plete dagitoy ket mapagbalin met a 21 a pisos para iti sumaruno a kilometro.
Mainaig iti daytoy, iti paset ti North of the River, umabot iti P35 a plete dagiti agturong iti Ayusan, Puyupuyan ken Lubong, P40 iti Binaratan, Sagpatan, Cunig, Lisud, Camanggaan ken Cabayugan, P45 iti Cabatiw/Cabaroan, Boundary, Manayon, Rukib, Suryab ken Carengngatan ken dadduma pay.
Iti paset met ti South of the River, umabot iti P50 iti minimum, P55 iti Paoa ken Curarig, P65 iti Tagami ken Boundary ken dadduma pay.
Kabayatanna, inpakaammo ni Vice Mayor Remigio Medrano iti ili ti Sarrat a daytoy nga addang ket tapno maalay-ayan ti parikot dagiti tricycle drivers iti baet ti oil crisis a mapaspasaran ditoy pagilian.
Innayonna nga adda ti maysa ribu a pisos a fuel subsidy para kadagiti rehistrado a tricycle operator iti ili ti Sarrat.
Immuna iti daytoy, nangipasa ti gakat ti Sangguniang Bayan iti ili ti Sarrat mainaig iti kalikagum a pannakaipangato ti plete ti tricycle iti nasao nga ili.
