LAOAG CITY – Nagpanawagan ti Federation of Jeepney Operators and Drivers Association of the Phlippines (FEJODAP) iti gobierno nga aprubaran ti P5 fare increase gapu iti sumagmamano a serye ti oil price hikes.
Inbatad ni FEJODAP president Ricardo “Boy” Rebaño a gapu iti agdama a sitwasyon ket arigna ti ar-aramiden dagiti driver ket para laeng iti serbisyo publiko.
Inpetteng na a saan da a tagidaksen ti makatulong iti publiko ngem ti laeng iruprupir da ket marikna koma ti gobierno ti paspasaren iti agdama dagiti driver.
Immunan nga inbatad ti Unioil Petroleum Philippines a maysa pay a rikos ti fuel price hike ti naituding a maipatungpal ita a lawas.
Iti kanito a matuloy ti pannakaipangato manen ti presyo ti produkto a petrolyo, daytoyen ti maika-siyam nga agsasaruno a lawas a panagngato ti presyo dagiti produkto a petrolyo sipud natappugan ti baro a tawen.
