LAOAG CITY – Inbutaktak ni Department of the Interior and Local Government Secretary Jonvic Remulla nga insubli ti Philippine National Police (PNP) iti iti Office of the President ti P500 milyon a maipagarop nga insertion iti P1.3 billion intelligence fund ti ahensya a saan a nausar.
Iti panagdengngeg iti Senado iti nailungalong a 2026 budget ti Department of the Interior and Local Government, inrakurak ni Senador Sherwin Gatchalian a bimmaba iti P800 milyon ti pondo iti 2026 para iti intelligence operations ti Philippine National Police manipod iti P1.3 bilyon idi 2025.
Kuna ni Remulla, ti nasao a P500 milyon ket naiserrek laeng ti maysa a kongresista iti budget.
Dinakamat pay ni Remulla ti kongresista a nangiserrek ti insertions ket maipagarop nga agkidkiddaw ti 3000 containers ti ikan ken iti paggaammo na ket manipod iti Region 5.
Maipalagip nga immunan a kinumpirmaran ni Agriculture Secretary Francisco Tiu Laurel a pilpiliten ni Cong. Zaldy Co nga aprubaran ti permit para iti importasyon ti 3,000 containers ti tallo a kumpanya.
Inpetteng ni Remulla a saan da nga inawat ti nayun a pondo gapu ta agamak amangan no adda ti kasukat daytoy.
Nasdaaw met ni Gatchalian no apay nga adda ti “insertion” iti intelligence fund ti nailian a pulisya.
Nupay kasta, inpasigurado ni Gatchalian a suportado ti Senado ti panangilatang ti umdas nga intelligence fund para iti Philippine National Police, ngem masapol nga agtalinaed daytoy a nadalos ken awan ti kasukat na.
