LAOAG CITY – Mangnamnama ti National Food Authority (NFA) a makagun-od daytoy ti nasurok kagudua a bilyon a pisos a birok iti nangato a selling price dagiti bagas iti Department of Social Welfare and Development (DSWD) ken dadduma pay nga ahensia ti gobierno.
Segun ken ni Agriculture Secretary ken National Food Authority Council chairman Francisco Tiu Laurel Jr. nga inaprobaran ti National Food Authority ti pannakaipangato iti selling price ti bagas.
Idi 2023, nakairekord ti National Food Authority ti net loss a P6.19 bilyon iti panangikagumaan daytoy nga ipursige ti ingkapilitan a gumatang ti irik manipud kadagiti lokal a mannalon ken mangbukel ti nine-day buffer stock a dumanon iti 300 a ribu a metriko tonelada ti bagas.
Inbatad ni National Food Authority Administrator Larry Lacson, mangipaay daytoy ti wagas tapno makagatang pay ti National Food Authority ti ad-adu pay nga irik manipud kadagiti mannalon a mangpapigsa iti rice buffer ti ahensia ken mangipangato iti birok dagiti mannalon.
Innayonna a ti selling price ket ngimmato ti P38 iti kada kilo manipud iti P25 iti kada kilo iti Department of Social Welfare and Development, dadduma pay a relief agencies ken dagiti Local Government Units nga awan met ti epekto iti market price ti bagas.
