LAOAG CITY – Agarup lima a milyon a pisos ti binulan a pondo a maipaay iti Malasakit Center iti Governor Roque Ablan Senior Memorial Hospital (GRASMH) ditoy ciudad ti Laoag.
Daytoy ti inbatad ni Senador Bong Go, ti nangidaulo ti pannakainagurar ti Malasakit Center.
Segun kenni Go, babaen iti Malasakit Center, maymaysan a lugar ti pagyanan ti Philhealth, Phil. Charity Sweepstakes Office (PCSO), Department of Health (DOH) ken Department of Social Welfare and Development (DSWD).
Inbatadna a ti kwalipikasyon ti Malasakit Center ket para kadagiti marigrigat ken indigent a Pilipino.
Kunana a babaen kadagiti uppat nga ahensya ket matulungan a mapagbalin a zero balance wenno awan ti bayadan iti ospital dagiti marigrigat a naka-admit iti nasao nga ospital.
Malaksid iti dayta, mangipaay pay ti senador ti 10 milyon a pisos iti nadakamat nga ospital.
Adda pay ti intedda a face masks, face shields, vitamins, bisikleta para kadagiti frontliners.
Naamoan a ti Malasakit Center a naestablisar ditoy ciudad ti Laoag ti maika-101 a naipasdek iti intero a pagilyan.
Kabayatanna, kadwa ni senador Go iti nasao nga inagurasyon da Ilocos Norte 2nd District Representative Angelo Marcos Barba, Sec. Michael Lloyd Dino, Presidential Assistant for the Visayas, Chief Presidential Legal Counsel Salvador Panelo, dati a Senador Bong Bong Marcos, Governor Matthew Marcos Manotoc, Vice Governor Cecilia Araneta Marcos, Mayor Michael Marcos Keon ken dadduma pay nga opisyal.
