LAOAG CITY – Pormalen nga insubmitir ti Kamara iti Senado ti P6.352-trilyon a mailunglungalong a 2025 budget a nakatutok kadagiti social services ken food security.
Indauloan ni Ako Bicol Rep. ken House Appropriations Committee Chairman Zaldy Co ti panangisubmitir iti nasao a pundo.
Ti nasao a national budget ket nailatang para iti dakkel a pundo para kadagiti marigrigat, mannalon, agad-adal ken dagiti suldado.
Inbatad ni Co, ninayonan ti Kongreso ti pondo para iti Assistance to Individuals in Crisis Situations wenno AICS ken Ayuda para sa Kapos ang Kita Program wenno AKAP para met kadagiti addaan ti trabaho ngem kurang ti sueldoda.
Inlawlawagna nga adda pay ti nayon a pundo para iti edukasion, agrikultura ken subsistence allowance dagiti suldado.
Manamnama a malpas inton Disiembre ti panangtalantan tapno mapirmaan ni Presidente Ferdinand Marcos Jr. sakbay nga agngudo ti tawen.
